ನವದೆಹಲಿ: ದೇಶದಲ್ಲಿ ‘ಪಿಎಂ ಸೂರ್ಯ ಘರ್ ‘ ಫಲಾನುಭವಿಗಳಿಗೆ ಸಹಾಯಧನ ನೀಡಲು ಕೇಂದ್ರ ಸರ್ಕಾರ ಬಜೆಟ್ ಅಲ್ಲಿ ಬರೋಬ್ಬರಿ 75,000 ಕೋಟಿ ಅನುದಾನ ಮೀಸಲಿಟ್ಟಿದೆ ಎಂದು ಕೇಂದ್ರ ಹೊಸ ಮತ್ತು ನವೀಕರಿಸಬಹುದಾದ ಇಂಧನ ಸಚಿವ ಪ್ರಲ್ಹಾದ ಜೋಶಿ ತಿಳಿಸಿದರು.
ಕೇಂದ್ರ ಸಂಸತ್ ಅಧಿವೇಶನದಲ್ಲಿ ವಿಪಕ್ಷ ಸದಸ್ಯರ ಪ್ರಶ್ನೆಗೆ ಉತ್ತರಿಸುವ ವೇಳೆ ಸಚಿವ ಜೋಶಿ, “ಪ್ರಧಾನ ಮಂತ್ರಿ ಸೂರ್ಯ ಘರ್” ಯೋಜನೆ ಬಗ್ಗೆ ಸಂಪೂರ್ಣ ಮಾಹಿತಿ ನೀಡುತ್ತ ಸದನದ ಗಮನ ಸೆಳೆದರು.
21 ದಿನದೊಳಗೆ ಸಹಾಯಧನ
ಸೂರ್ಯ ಘರ್ ಫಲಾನುಭವಿಗಳಿಗೆ ಯೋಜನೆ ಅಳವಡಿಸಿದ 15ರಿಂದ 21 ದಿನದೊಳಗೆ ಅವರ ಬ್ಯಾಂಕ್ ಖಾತೆಗೆ ನೇರವಾಗಿ ಸಹಾಯಧನ ವರ್ಗಾವಣೆ ಆಗಲಿದ್ದು,ಇದರಲ್ಲಿ ಯಾರದ್ದೂ ಮಧ್ಯಸ್ಥಿಕೆ ಅವಶ್ಯಕತೆಯೇ ಇಲ್ಲ ಎಂದು ಸಚಿವರು ಸ್ಪಷ್ಟಪಡಿಸಿದರು.
ಇದನ್ನೂ ಓದಿ: ಕಾರ್ಮಿಕರಿಗೆ ವೃದ್ಧಾಪ್ಯದಲ್ಲಿ ಸಹಾಯ ಮಾಡುವ ಶ್ರಮ್ ಯೋಗಿ ಮಾನ್-ಧನ್ ಯೋಜನೆಯ ಸೌಲಭ್ಯಗಳೇನು? ನೋಂದಣಿ ಮಾಡಿಕೊಳ್ಳುವುದು ಹೇಗೆ?
ಯೋಜನೆ ಗುರಿ ಮೀರಿದೆ
ದೇಶಾದ್ಯಂತ 1 ಕೋಟಿ ಕುಟುಂಬಗಳನ್ನು ಸೂರ್ಯ ಘರ್ ಯೋಜನೆಯಡಿ ತರಲು ಗುರಿ ಹೊಂದಲಾಗಿತ್ತು. ಆದರೆ, ಈಗಾಗಲೇ 1.5 ಕೋಟಿ ನೋಂದಣಿ ಆಗಿದೆ. ಜನರಿಂದ ಅತ್ಯುತ್ತಮ ಸ್ಪಂದನೆ ದೊರೆಯುತ್ತಿದೆ ಎಂದು ಹೇಳಿದರು.
ಈಗಾಗಲೇ 6.28 ಲಕ್ಷ ಸಂಪರ್ಕ
ದೇಶದಲ್ಲಿ ಈಗಾಗಲೇ 6.28 ಲಕ್ಷ ಮನೆಗಳಿಗೆ ಸೂರ್ಯ ಘರ್ ಸಂಪರ್ಕ ನೀಡಲಾಗಿದ್ದು, ಜನರ ಅನುಕೂಲಕ್ಕಾಗಿ ಬಳಕೆದಾರ ಸ್ನೇಹಿ ಪೋರ್ಟಲ್ ಸಹ ಲಭ್ಯವಿದ್ದು, ಪ್ರತಿಯೊಂದು ರಾಜ್ಯ ಸರ್ಕಾರಗಳೂ ಈ ಯೋಜನೆಗೆ ಬೆಂಬಲ ನೀಡಬೇಕು ಎಂದು ಸಚಿವ ಪ್ರಲ್ಹಾದ ಜೋಶಿ ಸದನದಲ್ಲಿ ಮನವಿ ಮಾಡಿದರು.
ಎಲ್ಲಾ ರಾಜ್ಯಗಳಿಗೂ ಇದೆ
ಸೂರ್ಯ ಘರ್ ಬಿಜ್ಲಿ ಯೋಜನೆ ಕೇವಲ ಗುಜರಾತ್, ತೆಲಂಗಾಣ ಅಂತಿಲ್ಲ. ದೇಶದ ಪ್ರತಿ ರಾಜ್ಯಕ್ಕೂ, ಪ್ರತಿ ಮನೆ ಮನೆಗೂ ಅನ್ವಯಿಸಲಿದ್ದು, ಆಯಾ ರಾಜ್ಯ ಸರ್ಕಾರಗಳು ಹೆಚ್ಚು ಹೆಚ್ಚು ಉತ್ಸಾಹ ತೋರಬೇಕಷ್ಟೇ ಎಂದು ಉತ್ತರ ಪ್ರದೇಶ ಸಂಸದರ ಪ್ರಶ್ನೆಗೆ ನಗುತ್ತಲೇ ಚಾಟಿ ಬೀಸಿದರು ಜೋಶಿ.
ಜಮ್ಮು ಕಾಶ್ಮೀರದಲ್ಲಿ 2.88 ಲಕ್ಷ ನೋಂದಣಿ
ಜಮ್ಮು ಮತ್ತು ಕಾಶ್ಮೀರ ಪ್ರದೇಶದಿಂದ ಈವರೆಗೆ 8,500 ಅರ್ಜಿಗಳನ್ನು ಸ್ವೀಕರಿಸಿದ್ದೇವೆ. ಇಲ್ಲಿ 2.88 ಲಕ್ಷ ನೋಂದಣಿಗಳು ನಡೆದಿವೆ ಎಂದು ತಿಳಿಸಿದರು.
ಇದನ್ನೂ ಓದಿ: ಹಾಲಿನ ಮಾರುಕಟ್ಟೆಗೂ ಪೆಟ್ಟು ಬೀಳೋ ಶಂಕೆ; ‘ನಂದಿನಿ ದೋಸೆ ಹಿಟ್ಟು’ ಉತ್ಪಾದನೆ ಕೈ ಬಿಟ್ಟ ಕೆಎಂಎಫ್
ಒಡಿಶಾದಿಂದ ಬಹು ಬೇಡಿಕೆ
ಒಡಿಶಾದಲ್ಲಿ ರಾಜ್ಯ ಸರ್ಕಾರ ಟಾಟಾ ಪವರ್ ಕಂಪನಿ ಬೆಂಬಲದೊಂದಿಗೆ ಮನೆಗಳ ಮೇಲ್ಛಾವಣಿ ಮೇಲೆ ಸೂರ್ಯ ಘರ್ ಅಳವಡಿಕೆ ಆರಂಭಿಸಿದೆ ಎಂದರು.
ಪಿಎಂ ಜನ್ ಮನ್, ಜನ್ ಜಾತಿಯ ಗ್ರಾಮ ಉತ್ಕರ್ಷ ಅಭಿಯಾನದ ಮೂಲಕ ಅತ್ಯಂತ ಹಿಂದುಳಿದ ಪ್ರದೇಶಗಳ 1 ಲಕ್ಷ ಮನೆಗಳ ಪೈಕಿ 50 ಸಾವಿರ ಮನೆಗಳಿಗೆ ಸಂಪೂರ್ಣ ಹಣಕಾಸು ನೆರವಿನಲ್ಲಿ ಸೂರ್ಯ ಘರ್ ಅಳವಡಿಸಲು ಯೋಜಿಸಲಾಗಿದೆ ಎಂದು ಸಚಿವರು ವಿವರಿಸಿದರು.
ವಿಶ್ವದಲ್ಲೇ ಅದ್ಭುತ ಯೋಜನೆ ಇದು: ದೇಶದಲ್ಲಿ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರು ಜಾರಿಗೊಳಿಸಿದ ಪಿಎಂ ಸೂರ್ಯ ಘರ್ ಬಿಜ್ಲಿ ಯೋಜನೆ ವಿಶ್ವದಲ್ಲೇ ಮಾದರಿಯದಂತಹ ಒಂದು ಅದ್ಭುತ ಯೋಜನೆಯಾಗಿದೆ ಎಂದು ಸಚಿವ ಪ್ರಲ್ಹಾದ ಜೋಶಿ ಪ್ರತಿಪಾದಿಸಿದರು.
ಶೂನ್ಯ ಬಂಡವಾಳದಲ್ಲಿ ಜನರೇ ವಿದ್ಯುತ್ ಉತ್ಪಾದಕರು ಆಗಬಹುದು: ಪಿಎಂ ಸೂರ್ಯ ಘರ್ ಯೋಜನೆಯಡಿ ಶೂನ್ಯ ಬಂಡವಾಳದಲ್ಲಿ ಜನರೇ ವಿದ್ಯುತ್ ಉತ್ಪಾದಕರೂ ಆಗಬಹುದು. ಕನಿಷ್ಠ 110 ಯುನಿಟ್ ವಿದ್ಯುತ್ ಉತ್ಪಾದಿಸಬಹುದು. 50-60 ಯುನಿಟ್ ವಿದ್ಯುತ್ ಅನ್ನು ಫಲಾನುಭವಿ ಬಳಸಿಯೂ ಉಳಿದ ಶೇ.50ರಷ್ಟು ವಿದ್ಯುತ್ ಅನ್ನು ಆಯಾ ವಿದ್ಯುತ್ ಮಂಡಳಿಗಳಿಗೆ ಮಾರಾಟ ಮಾಡಿ ಆದಾಯದ ಮಾರ್ಗ ಕಂಡುಕೊಳ್ಳಲು ಸಾಧ್ಯವಿದೆ ಎಂದು ತಿಳಿಸಿದರು.
ಹಸಿರು ಶಕ್ತಿಯ ಕ್ರಾಂತಿ: ಪಿಎಂ ಸೂರ್ಯ ಘರ್ ಯೋಜನೆ ದೇಶದಲ್ಲಿ ಹಸಿರು ಶಕ್ತಿಯ ಕ್ರಾಂತಿಗೆ ಕಾರಣವಾಗುತ್ತದೆ ಮತ್ತು ಜಾಗತಿಕ ತಾಪಮಾನವನ್ನೂ ಕಡಿಮೆ ಮಾಡುತ್ತದೆ ಎಂದು ಜೋಶಿ ಸದನದ ಗಮನ ಸೆಳೆದರು.
