ವಾರಂಗಲ್: ಎಸ್ಬಿಐ ದರೋಡೆ ಪ್ರಕರಣವನ್ನು ಭೇದಿಸಿದ ವಾರಂಗಲ್ ಪೊಲೀಸರು ಏಳು ಸದಸ್ಯರ ದರೋಡೆ ತಂಡದ ಮೂವರನ್ನು ಬಂಧಿಸಿ, 1.8 ಕೋಟಿ ಮೌಲ್ಯದ 2.520 ಕೆಜಿ ಚಿನ್ನದ ಆಭರಣಗಳನ್ನು ವಶಪಡಿಸಿಕೊಂಡಿದ್ದಾರೆ.
ಕಳ್ಳರು ಎಸ್ಬಿಐ ಶಾಖೆಯ ಬಾಗಿಲು ಮುರಿದು ಗ್ರಾಹಕರು ಅಡಮಾನ ಇರಿಸಿದ್ದ 13 ಕೋಟಿ ರೂಪಾಯಿ ಮೌಲ್ಯದ ಚಿನ್ನದ ಆಭರಣಗಳನ್ನು ದೋಚಿದ್ದರು. ನವೆಂಬರ್ 19ರ ರಾತ್ರಿ ರಾಯಪರ್ತಿ ಮಂಡಲದ ಎಸ್ಬಿಐನಲ್ಲಿ ನಡೆದ ಬ್ಯಾಂಕ್ ದರೋಡೆ ಜಿಲ್ಲೆಯಲ್ಲಿ ಕೋಲಾಹಲವನ್ನು ಸೃಷ್ಟಿಸಿದ್ದು ಮಾತ್ರವಲ್ಲದೇ ವಿವಿಧ ಬ್ಯಾಂಕುಗಳ ಅಧಿಕಾರಿಗಳು ಕೈಗೊಂಡ ಸುರಕ್ಷತಾ ಕ್ರಮಗಳ ಬಗ್ಗೆಯೂ ಅನುಮಾನಗಳನ್ನು ಹುಟ್ಟುಹಾಕಿದೆ.
ಮಾಧ್ಯಮಗಳಿಗೆ ಘಟನೆ ಕುರಿತು ಮಾಹಿತಿ ನೀಡಿದ ಪೊಲೀಸ್ ಆಯುಕ್ತ ಅಂಬರ್ ಕಿಶೋರ್ ಝಾ, ತಂಡದ ಮೂವರು ಸದಸ್ಯರನ್ನು ಅರ್ಷದ್ ಅನ್ಸಾರಿ (34), ಶಕೀರ್ ಖಾನ್ ಅಲಿಯಾಸ್ ಭೋಲೆ ಖಾನ್ (28) ಮತ್ತು ಹಿಮಾಂಶು ಬಿಗಮ್ ಚಾಂದ್ ಝಾನ್ವಾರ್ (30) ಎಂದು ಗುರುತಿಸಲಾಗಿದೆ ಎಂದು ಹೇಳಿದರು.
ಪ್ರಮುಖ ಆರೋಪಿಯನ್ನು ಮೊಹಮ್ಮದ್ ನವಾಬ್ ಹಸನ್ (39) ಎಂದು ಗುರುತಿಸಲಾಗಿದ್ದು, ಇತರ ಮೂವರನ್ನು ಉತ್ತರ ಪ್ರದೇಶದ ನಿವಾಸಿ ಜಾಕೀರ್ ಅಲಿ ಖಾನ್ (35), ಮಹಾರಾಷ್ಟ್ರದ ನಿವಾಸಿಗಳಾದ ಅಕ್ಷಯ್ ಗಜಾನನ್ ಅಂಬೋರ್ (24) ಮತ್ತು ಸಾಗರ್ ಭಾಸ್ಕರ್ ಘೋರ್ (32). ಎಂದು ಗುರುತಿಸಲಾಗಿದ್ದು, ನಾಲ್ವರೂ ತಲೆಮರೆಸಿಕೊಂಡಿದ್ದಾರೆ.
ಮೊಹಮ್ಮದ್ ನವಾಬ್ ಹಸನ್ ಏಳು ಸದಸ್ಯರ ಗುಂಪನ್ನು ರಚಿಸಿದ್ದನು, ಅವರು ದೂರದ ಸ್ಥಳಗಳಲ್ಲಿ ಮತ್ತು ಗ್ರಾಮೀಣ ಪ್ರದೇಶಗಳಲ್ಲಿ ಇರುವ ಬ್ಯಾಂಕುಗಳನ್ನು ಗುರಿಯಾಗಿಸಿಕೊಂಡು ಹಲವಾರು ಕಳ್ಳತನಗಳಲ್ಲಿ ತೊಡಗಿದ್ದರು. ಅವರು ವ್ಯಾಪಾರ ಮಾಡುವ ಹೆಸರಿನಲ್ಲಿ ಹೈದರಾಬಾದ್ನಲ್ಲಿ ಒಂದು ಮನೆಯನ್ನು ಬಾಡಿಗೆಗೆ ತೆಗೆದುಕೊಂಡರು. ನವಾಬ್ ಹಸನ್ ಮೊದಲು ರಾಯಪರ್ತಿ ಮಂಡಲದಲ್ಲಿ ಎಸ್.ಬಿ.ಐನ್ನು ಲೂಟಿ ಮಾಡಲು ನಿರ್ಧರಿಸಿದರು.
ನವೆಂಬರ್ 18 ರಂದು, ಅವರು ಹೈದರಾಬಾದ್ನಲ್ಲಿ ಕಾರನ್ನು ಬಾಡಿಗೆಗೆ ಪಡೆದು ರಾಯ್ಪರ್ಥಿಯನ್ನು ತಲುಪಿದರು. ರಾತ್ರಿ 11ರ ಸುಮಾರಿಗೆ, ಅವರು ಬ್ಯಾಂಕಿನ ವಿದ್ಯುತ್ ಮತ್ತು ಅಲಾರ್ಮ್ ತಂತಿಗಳನ್ನು ಕತ್ತರಿಸಿದ ನಂತರ ಬ್ಯಾಂಕ್ ಅನ್ನು ತೆರೆದರು. ಗ್ಯಾಸ್ ಕಟ್ಟರ್ ಸಹಾಯದಿಂದ ಸ್ಟ್ರಾಂಗ್ ರೂಂ ತೆರೆದು 13.61 ಕೋಟಿ ಮೌಲ್ಯದ ಚಿನ್ನಾಭರಣ ದೋಚಿದ್ದಾರೆ.
ಮರುದಿನ ಮುಂಜಾನೆ ಅವರು ಹೈದರಾಬಾದ್ ಹೋಗಿ ಆಭರಣಗಳನ್ನು ಸಮಾನವಾಗಿ ವಿತರಿಸಿದರು. ತಮ್ಮನ್ನು ಮೂರು ತಂಡಗಳಾಗಿ ವಿಂಗಡಿಸಿಕೊಳ್ಳುವ ಮೂಲಕ, ಅವರು ಮನೆಯನ್ನು ಖಾಲಿ ಮಾಡಿ ಮಹಾರಾಷ್ಟ್ರ ಮತ್ತು ಉತ್ತರ ಪ್ರದೇಶಕ್ಕೆ ಪರಾರಿಯಾದರು.
ಪಶ್ಚಿಮ ವಲಯದ ಡಿಸಿಪಿ ರಾಜಾ ಮಹೇಂದ್ರ ನಾಯಕ್ ಅವರ ನೇತೃತ್ವದಲ್ಲಿ ಕಳ್ಳರನ್ನು ಬಂಧಿಸಲು ಹತ್ತು ವಿಶೇಷ ಪೊಲೀಸ್ ತಂಡಗಳನ್ನು ನಿಯೋಜಿಸಲಾಯಿತು ಮತ್ತು ಕಳ್ಳರನ್ನು ಪತ್ತೆಹಚ್ಚುವ ಸುಧಾರಿತ ತಂತ್ರಜ್ಞಾನವನ್ನು ಬಳಸಿ ತಂಡದ ಮೂವರು ಸದಸ್ಯರನ್ನು ಬಂಧಿಸಲಾಯಿತು. ಮತ್ತು ತಲೆಮರೆಸಿಕೊಂಡಿರುವ ಉಳಿದ ನಾಲ್ವರನ್ನು ಬಂಧಿಸಲು ಶೋಧ ಕಾರ್ಯವನ್ನು ಪ್ರಾರಂಭಿಸಲಾಯಿತು.
ಎಸಿಪಿಗಳಾದ ನರಸೈಯಾ, ಬೊಜರಾಜ, ಕಿರಣ್ ಕುಮಾರ್, ಇನ್ಸ್ಪೆಕ್ಟರ್ ಗಳಾದ ಸಂತೋಷ್, ಶ್ರೀನಿವಾಸ ರೆಡ್ಡಿ, ಬಾಲಾಜಿ, ವರ ಪ್ರಸಾದ್, ಶಿವ ಕುಮಾರ್, ರಘುಪತಿ ರೆಡ್ಡಿ, ಶ್ರೀನಿವಾಸ ರಾವ್, ಮಹೇಂದ್ರ ರೆಡ್ಡಿ, ಅಬ್ಬಯ್ಯ, ಪವನ್ ಕುಮಾರ್, ವಿಶ್ವೇಶ್ವರ್ ಮತ್ತು ಸಲ್ಮಾನ್ ಪಾಷಾ ಅವರನ್ನೊಳಗೊಂಡ ಪೊಲೀಸ್ ತಂಡವನ್ನು ಡಿಸಿಪಿ ಶ್ಲಾಘಿಸಿದರು.
