ಬೆಂಗಳೂರು: ದುಬೈನಿಂದ 3.99 ಕೆಜಿ ಚಿನ್ನವನ್ನು ತನ್ನ ಅಂಗಿಯ ಕೆಳಗೆ ಮರೆಮಾಚಿ ಕಳ್ಳಸಾಗಣೆ ಮಾಡಲು ದೃಷ್ಟಿಹೀನ ಪ್ರಯಾಣಿಕ ನಡೆಸಿದ ಪ್ರಯತ್ನವನ್ನು ಬೆಂಗಳೂರು ವಿಮಾನ ನಿಲ್ದಾಣದ ಕಸ್ಟಮ್ಸ್ ಅಧಿಕಾರಿಗಳು ವಿಫಲಗೊಳಿಸಿದ್ದಾರೆ. ವಶಪಡಿಸಿಕೊಂಡ ಚಿನ್ನದ ಮೌಲ್ಯ ಸುಮಾರು 3.44 ಕೋಟಿ ರೂ. ಎನ್ನಲಾಗಿದೆ.
ಒಂದು ವಾರದೊಳಗೆ ವಿಮಾನ ನಿಲ್ದಾಣದಲ್ಲಿ ನಡೆದ ಎರಡನೇ ದೊಡ್ಡ ಚಿನ್ನ ಕಳ್ಳಸಾಗಣೆಯನ್ನು ವಶಪಡಿಸಿಕೊಳ್ಳಲಾಗಿದೆ. ಮಾರ್ಚ್ 3 ರಂದು ದುಬೈನಿಂದ ಬಾರ್ ರೂಪದಲ್ಲಿ 14.8 ಕೆಜಿ ಚಿನ್ನವನ್ನು ಕಳ್ಳಸಾಗಣೆ ಮಾಡುವ ಪ್ರಯತ್ನದಲ್ಲಿ ನಟಿ ರನ್ಯಾ ರಾವ್ ಸಿಕ್ಕಿಬಿದ್ದಿದ್ದರು.
“ದೃಷ್ಟಿಹೀನ ವ್ಯಕ್ತಿಯು ಅವನೊಂದಿಗೆ ದೊಡ್ಡ ಪ್ರಮಾಣದ ಚಿನ್ನವನ್ನು ತರುವ ಬಗ್ಗೆ ನಮಗೆ ಮುನ್ಸೂಚನೆ ಸಿಕ್ಕಿತ್ತು. ಮಾರ್ಚ್ 4 ರಂದು ವೀಲ್‌ಚೇರ್ ಮೇಲೆ ನಿಲ್ದಾಣದ ಸಿಬ್ಬಂದಿ ಸಹಾಯದಲ್ಲಿ ಹೊರಗೆ ಹೊರಟಿದ್ದ ದೃಷ್ಟಿಹೀನ ಪ್ರಯಾಣಿಕನನ್ನು ತಡೆದು ಪರಿಶೀಲಿಸಿದಾಗ, ಆತ ಸಂಜೆ 6 ಗಂಟೆ ಸುಮಾರಿಗೆ ಎಮಿರೇಟ್ಸ್ ವಿಮಾನದಲ್ಲಿ ಆಗಮಿಸಿದ್ದ. ಆತನ ಪಾಸ್ಪೋರ್ಟ್ ಕಡಿಮೆ ಅವಧಿಯಲ್ಲಿ ದುಬೈಗೆ ಅನೇಕ ಪ್ರವಾಸಗಳನ್ನು ಕೈಗೊಂಡಿರುವುದನ್ನು ಸೂಚಿಸುತ್ತಿತ್ತು.
ಈ ವೇಳೆ ಮೂವತ್ತರ ಹರೆಯದ ಪ್ರಯಾಣಿಕನನ್ನು ತಪಾಸಣೆಗೊಳಪಡಿಸಿದಾಗ, ಅನೇಕ ಸರಪಳಿಗಳ ರೂಪದಲ್ಲಿ ಚಿನ್ನವನ್ನು ಕಳ್ಳಸಾಗಣೆ ಮಾಡುತ್ತಿರುವುದು ಕಂಡುಬಂದಿದ್ದು, ಅವನೊಂದಿಗೆ ವ್ಯಾಪಾರ ಪಾಲುದಾರರೊಬ್ಬರು ಇದ್ದರು.
“ಚಿನ್ನದ ಕಳ್ಳಸಾಗಣೆಯಲ್ಲಿ ಅವರು ಭಾಗಿಯಾಗಿದ್ದಾರೆಯೇ ಎಂದು ಕಂಡುಹಿಡಿಯಲು ನಾವು ಇನ್ನೂ ಅವರ ಜೊತೆಗಿದ್ದವನನ್ನು ವಿಚಾರಿಸುತ್ತಿದ್ದೇವೆ.” ಸದ್ಯ ಚಿನ್ನವನ್ನು ವಶಪಡಿಸಿಕೊಳ್ಳಲಾಗಿದ್ದು, ಪ್ರಕರಣ ದಾಖಲಿಸಲಾಗಿದೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದರು.
