ಕಾರವಾರ: ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಶನಿವಾರ ಕಾರವಾರದಲ್ಲಿ ಭಾರತೀಯ ನೌಕಾಪಡೆಯ ಓಎಸ್‌ಪಿ ಹಡಗು ಐಎನ್‌ಎಸ್ ಸುನಯನಾವನ್ನು ‘ಐಒಎಸ್ ಸಾಗರ್’ (ಸೆಕ್ಯುರಿಟಿ ಆಂಡ್ ಗ್ರೋತ್ ಫಾರ್ ಆಲ್ ಇನ್ ದಿ ರೀಜನ್) ಕಾರ್ಯಾಚರಣೆಗೆ ಲೋಕಾರ್ಪಣೆ ಮಾಡಿದರು.
2,000 ಕೋಟಿ ರೂಪಾಯಿ ಮೌಲ್ಯದ ‘ಪ್ರಾಜೆಕ್ಟ್ ಸೀಬರ್ಡ್’ ಅಡಿಯಲ್ಲಿ ನಿರ್ಮಿತ ಆಧುನಿಕ ಕಾರ್ಯಾಚರಣಾ, ದುರಸ್ತಿ ಮತ್ತು ಲಾಜಿಸ್ಟಿಕ್ ಸೌಲಭ್ಯಗಳನ್ನು ಉದ್ಘಾಟಿಸಿದರು. ರಕ್ಷಣಾ ಸಚಿವರ ಜೊತೆಗೆ ರಕ್ಷಣಾ ಪ್ರಧಾನಾಧಿಕಾರಿ ಜನರಲ್ ಅನಿಲ್ ಚೌಹಾಣ್, ನೌಕಾಪಡೆಯ ಪ್ರಧಾನಾಧಿಕಾರಿ ಅಡ್ಮಿರಲ್ ದಿನೇಶ್ ಕೆ. ತ್ರಿಪಾಠಿ, ರಕ್ಷಣಾ ಕಾರ್ಯದರ್ಶಿ ರಾಜೇಶ್ ಕುಮಾರ್ ಸಿಂಗ್ ಹಾಗೂ ಹಿರಿಯ ಅಧಿಕಾರಿಗಳು ಹಾಜರಿದ್ದರು.
9 ರಾಷ್ಟ್ರಗಳ ನೌಕಾ ಸಿಬ್ಬಂದಿಗೆ ತರಬೇತಿ:
ಕೊಮೊರೊಸ್, ಕೀನ್ಯಾ, ಮಡಗಾಸ್ಕರ್, ಮಾಲ್ಡೀವ್ಸ್, ಮಾರಿಷಸ್, ಮೊಜಾಂಬಿಕ್, ಸೀಶೆಲ್ಸ್, ಶ್ರೀಲಂಕಾ ಮತ್ತು ಟಾಂಜಾನಿಯಾದ 44 ನೌಕಾ ಸಿಬ್ಬಂದಿಯೊಂದಿಗೆ ಹಡಗಿನ ಧ್ವಜಾರೋಹಣವು ಪ್ರಾದೇಶಿಕ ಸಾಗರೀಯ ಭದ್ರತೆ ಮತ್ತು ಅಂತರರಾಷ್ಟ್ರೀಯ ಸಹಯೋಗದಲ್ಲಿ ಭಾರತದ ಬದ್ಧತೆಗೆ ಮಹತ್ವದ ಹೆಜ್ಜೆಯಾಗಿದೆ.
ಸಾಗರೀಯ ಶಾಂತಿ ಮತ್ತು ಸಮೃದ್ಧಿಗೆ ಭಾರತದ ಬದ್ಧತೆ:
ಭಾರತೀಯ ಕರಾವಳಿ ಪ್ರದೇಶದ ಪಾಲುದಾರ ರಾಷ್ಟ್ರಗಳ ಪ್ರತಿನಿಧಿಗಳನ್ನು ಸಂಬೋಧಿಸಿದ ರಾಜನಾಥ್ ಸಿಂಗ್, ಐಒಎಸ್ ಸಾಗರ್ ಅನ್ನು “ಸಾಗರೀಯ ಪ್ರದೇಶದಲ್ಲಿ ಶಾಂತಿ, ಸಮೃದ್ಧಿ ಮತ್ತು ಸಾಮೂಹಿಕ ಭದ್ರತೆಗೆ ಭಾರತದ ಬದ್ಧತೆಯ ಪ್ರತಿಬಿಂಬ” ಎಂದು ವರ್ಣಿಸಿದರು. “ನಮ್ಮ ನೌಕಾಪಡೆ ಐಒಆರ್‌ನಲ್ಲಿ ಸ್ನೇಹಿ ರಾಷ್ಟ್ರಗಳ ಸಾರ್ವಭೌಮತ್ವವನ್ನು ರಕ್ಷಿಸುತ್ತದೆ” ಎಂದು ಹೇಳಿದರು.
10ನೇ ಸಾಗರ್ ವಾರ್ಷಿಕೋತ್ಸವದ ಸಂದರ್ಭ:
ಸಾಗರ್ ಉಪಕ್ರಮದ 10ನೇ ವಾರ್ಷಿಕೋತ್ಸವ ಮತ್ತು ರಾಷ್ಟ್ರೀಯ ಸಾಗರ ದಿನದ ಸಂದರ್ಭದಲ್ಲಿ ಈ ಧ್ವಜಾರೋಹಣ ನಡೆದಿದೆ. ಪ್ರಧಾನಿ ನರೇಂದ್ರ ಮೋದಿಯವರ ‘ಮಹಾಸಾಗರ್’ ಉಪಕ್ರಮವನ್ನು ಸ್ಮರಿಸಿದ ರಕ್ಷಣಾ ಮಂತ್ರಿ, “ಐಒಎಸ್ ಸಾಗರ್‌ನ ಪ್ರಯಾಣವನ್ನು ಪ್ರಾರಂಭಿಸಲು ಇದಕ್ಕಿಂತ ಉತ್ತಮ ಸಮಯ ಬೇರೆ ಇರಲಾರದು” ಎಂದರು.
ಐಎನ್‌ಎಸ್ ಸುನಯನಾದ ವಿಶೇಷ ಕಾರ್ಯಾಚರಣೆ:
ನೂತನ ಹಡಗು ಡಾರ್-ಎಸ್-ಸಲಾಮ್, ನಕಾಲಾ, ಪೋರ್ಟ್ ಲೂಯಿಸ್ ಮತ್ತು ಪೋರ್ಟ್ ವಿಕ್ಟೋರಿಯಾಕ್ಕೆ ಭೇಟಿ ನೀಡಲಿದೆ. ಅಂತರರಾಷ್ಟ್ರೀಯ ಸಿಬ್ಬಂದಿಗೆ ಕೊಚ್ಚಿಯಲ್ಲಿ ತರಬೇತಿ ನೀಡಲಾಗುವುದು. ಫೈರ್ ಫೈಟಿಂಗ್, ಡ್ಯಾಮೇಜ್ ಕಂಟ್ರೋಲ್, ಬ್ರಿಡ್ಜ್ ಆಪರೇಷನ್ಸ್ ಸೇರಿದಂತೆ 8 ರೀತಿಯ ತರಬೇತಿ ಕಾರ್ಯಕ್ರಮಗಳು ನಡೆಯಲಿವೆ.
ಪ್ರಾಜೆಕ್ಟ್ ಸೀಬರ್ಡ್ ಸೌಲಭ್ಯಗಳು:
480 ನಿವಾಸ ಘಟಕಗಳು, 25 ಕಿಮಿ ರಸ್ತೆ ಜಾಲ, 12 ಕಿಮೀ ಡ್ರೈನೇಜ್ ವ್ಯವಸ್ಥೆ, ಜಲಾಶಯಗಳು ಮತ್ತು ಸುರಕ್ಷತಾ ಗೋಪುರಗಳನ್ನು ಒಳಗೊಂಡಿರುವ ಈ ಸೌಲಭ್ಯಗಳು ಪಶ್ಚಿಮ ಕರಾವಳಿಯ ಕಾರ್ಯಾಚರಣೆಗಳನ್ನು ಬಲಪಡಿಸಲಿವೆ. 90% ಸಾಮಗ್ರಿಗಳು ಸ್ವದೇಶಿ ತಯಾರಿಕೆಯಾಗಿವೆ.
ಸ್ಥಳೀಯ ಅರ್ಥವ್ಯವಸ್ಥೆಗೆ ಪ್ರೋತ್ಸಾಹ:
ಕಾರವಾರ ನೌಕಾ ನೆಲೆಯ ಕಾರ್ಯಾಚರಣೆಯು ಉತ್ತರ ಕನ್ನಡ ಜಿಲ್ಲೆಯ ಸ್ಥಳೀಯ ಆರ್ಥಿಕತೆಗೆ ಗಮನಾರ್ಹ ಬೆಂಬಲ ನೀಡಲಿದೆ ಎಂದು ರಕ್ಷಣಾ ಮಂತ್ರಿ ತಿಳಿಸಿದರು. “ಸಾಗರೀಯ ಸಹಯೋಗ ಮತ್ತು ಸಾಮೂಹಿಕ ಭದ್ರತೆಗಾಗಿ ಭಾರತ ಮುಂದುವರಿಯುತ್ತದೆ” ಎಂದು ಅವರು ಭರವಸೆ ನೀಡಿದರು.
