‘ಮಾಂಗಲ್ಯ’ ಧರಿಸಿ ಶಾಲೆಗೆ ಬಂದ ಬಾಲಕಿ: ಬಾಲ್ಯ ವಿವಾಹ ಕಾಯ್ದೆಯಡಿ ಐವರ ವಿರುದ್ಧ ಪ್ರಕರಣ ದಾಖಲು

ಕೃಷ್ಣಗಿರಿ: ಕೃಷ್ಣಗಿರಿಯ ಸರ್ಕಾರಿ ಶಾಲೆಯೊಂದರ ಶಿಕ್ಷಕರು 14 ವರ್ಷದ ಬಾಲಕಿಯೊಬ್ಬಳು ‘ತಾಳಿ’ ಧರಿಸಿ ಶಾಲೆಗೆ ಹೋಗುತ್ತಿರುವುದನ್ನು ಗಮನಿಸಿದ ಬೆನ್ನಲ್ಲೇ, 25 ವರ್ಷದ ಯುವಕ, ಆತನ ಪೋಷಕರು ಮತ್ತು ಅತ್ತೆ-ಮಾವ ಸೇರಿ ಐವರ ವಿರುದ್ಧ ಬಾಲ್ಯ ವಿವಾಹ ನಿಷೇಧ ಕಾಯ್ದೆಯಡಿ ಪ್ರಕರಣ ದಾಖಲಿಸಲಾಗಿದೆ.

ಸಮಾಜ ಕಲ್ಯಾಣ ಇಲಾಖೆಯ ಮೂಲಗಳ ಪ್ರಕಾರ, ಬಾಲಕಿಯ ವಿವಾಹವು 25 ವರ್ಷದ ವ್ಯಕ್ತಿಯೊಂದಿಗೆ ಮುಂಜಾನೆ ನೆರವೇರಿತು ಮತ್ತು ನಂತರ ಅವಳು ಶಾಲೆಗೆ ಹೋದಳು. ಬೋಲುಪಳ್ಳಿ ಬಳಿಯ ದೇವಾಲಯವೊಂದರಲ್ಲಿ ಕಾವೇರಿಪಟ್ಟಿನಮ್ ಬಳಿ ವಾಸಿಸುತ್ತಿದ್ದ 25 ವರ್ಷದ ಬಡಗಿಗೆ ಆಕೆಯನ್ನು ಮದುವೆ ಮಾಡಿ ಕೊಡಲಾಗಿತ್ತು.

ಅವಳು ತಾಳಿಯೊಂದಿಗೆ ಶಾಲೆಗೆ ಹೋಗುತ್ತಿದ್ದಾಗ, ಅವಳ ಮದುವೆಯಾಗಿರುವುದು ಶಿಕ್ಷಕರ ಗಮನಕ್ಕೆ ಬಂದಿದ್ದು ಕೂಡಲೇ ಮಕ್ಕಳ ರಕ್ಷಣಾ ಇಲಾಖೆ, ಸಮಾಜ ಕಲ್ಯಾಣ ಇಲಾಖೆಗೆ ಮಾಹಿತಿ ನೀಡಿದರು. ಮಕ್ಕಳ ರಕ್ಷಣೆ ಮತ್ತು ಸಮಾಜ ಕಲ್ಯಾಣ ಇಲಾಖೆಗಳ ತಂಡವು ಶಾಲೆಗೆ ಆಗಮಿಸಿ ಬಾಲಕಿ ಮತ್ತು ಶಿಕ್ಷಕರೊಂದಿಗೆ ವಿಚಾರಣೆ ನಡೆಸಿತು.

ಹಬ್ಬವೊಂದಕ್ಕೆ ಹೊಸ ಬಟ್ಟೆಗಳನ್ನು ತರುವುದಾಗಿ ಹುಡುಗಿ ತನ್ನ ಸ್ನೇಹಿತರಿಗೆ ತಿಳಿಸಿದ್ದಳು ಎಂದು ಮೂಲಗಳು ತಿಳಿಸಿವೆ.  “ಕಳೆದವಾರ, ಅವಳು ಹಬ್ಬಕ್ಕೆ ಹೊಸ ಉಡುಪನ್ನು ಖರೀದಿಸಿ ಶಾಲೆಗೆ ಮರಳುವುದಾಗಿ ತನ್ನ ಸ್ನೇಹಿತರಿಗೆ ಹೇಳಿದ್ದಳು. ಆದರೆ ಬಳಿಕ ಆಕೆ ತಾಳಿ ಧರಿಸಿ ಸಮವಸ್ತ್ರದಲ್ಲಿ ಬಂದಿದ್ದಳು. ಆಕೆಯ ಸ್ನೇಹಿತರು ವಿಚಾರಿಸಿದಾಗ, ತಾನು ಮದುವೆಯಾಗಿದ್ದೇನೆ ಎಂದು ಆಕೆ ಬಹಿರಂಗಪಡಿಸಿದಳು” ಎಂದು ಮೂಲಗಳು ತಿಳಿಸಿವೆ. ಮದುವೆಯನ್ನು ದೇವಾಲಯದ ಮುಂದೆ ಕತ್ತಲೆಯಲ್ಲಿ ನಡೆಸಲಾಯಿತು.

ವಿಚಾರಣೆಯ ನಂತರ, ಅದೇ ರಾತ್ರಿ, ಸಮಾಜ ಕಲ್ಯಾಣ ಇಲಾಖೆಯ ಸಿಬ್ಬಂದಿಯೊಬ್ಬರು ಕೃಷ್ಣಗಿರಿ ಅಖಿಲ ಮಹಿಳಾ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಬಾಲಕಿಯ ಪೋಷಕರು, ಆಕೆಯನ್ನು ಮದುವೆಯಾದ ವ್ಯಕ್ತಿ ಮತ್ತು ಆತನ ಪೋಷಕರ ವಿರುದ್ಧ ಬಾಲ್ಯ ವಿವಾಹ ನಿಷೇಧ ಕಾಯ್ದೆಯ ವಿವಿಧ ಸೆಕ್ಷನ್ಗಳ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ.

ಇದುವರೆಗೆ ಯಾರನ್ನೂ ಬಂಧಿಸಿದ ವರದಿಯಾಗಿಲ್ಲ. ಸಮಾಜ ಕಲ್ಯಾಣ ಇಲಾಖೆಯು ಶಾಲೆಗಳಲ್ಲಿ ಮತ್ತು ಬಾಲಕಿಯರ ಮತ್ತು ಬಾಲಕರ ಹಳ್ಳಿಗಳಲ್ಲಿ ಬಾಲ್ಯ ವಿವಾಹದ ವಿರುದ್ಧ ಜಾಗೃತಿ ಕಾರ್ಯಕ್ರಮಗಳನ್ನು ನಡೆಸಲು ಯೋಜಿಸಿದೆ.