ಸಾರ್ವಜನಿಕ ಭವಿಷ್ಯ ನಿಧಿ ಪಿಪಿಎಫ್ ( Public Provident Fund) ಯೋಜನೆ ಕೇಂದ್ರ ಸರ್ಕಾರ ನೀಡುವ ಯೋಜನೆಗಳಲ್ಲಿ ಒಂದು. ಈ ಯೋಜನೆಗೆ ಸೇರ್ಪಡೆಗೊಳ್ಳುವುದರಿಂದ ನಿಮಗೆ ಖಚಿತವಾದ ಲಾಭ ದೊರೆಯುತ್ತದೆ. ಯಾವುದೇ ಅಪಾಯವಿಲ್ಲ. ನಿಮ್ಮ ಹತ್ತಿರದ ಬ್ಯಾಂಕ್ಗೆ ಹೋಗಿ ಈ ಯೋಜನೆಗೆ ಸೇರಬಹುದು. ಅಲ್ಲದೆ ಪೋಸ್ಟ್ ಆಫೀಸ್ ನಲ್ಲಿ ಕೂಡ ಪಿಪಿಎಫ್ ಯೋಜನೆ ಲಭ್ಯವಿದೆ.
ಸಾರ್ವಜನಿಕ ಭವಿಷ್ಯ ನಿಧಿ ( Public Provident Fund) ಯೋಜನೆ ಮುಕ್ತಾಯ ಅವಧಿ 15 ವರ್ಷಗಳು. ಅಂದರೆ ನೀವು 15 ವರ್ಷಗಳ ಕಾಲ ಹಣವನ್ನು ಹೂಡಿಕೆ ಮಾಡಬೇಕು. ಪಿಪಿಎಫ್ ಯೋಜನೆಗೆ ಸೇರುವ ಮೂಲಕ ನೀವು ತೆರಿಗೆ ಕಡಿತ ಪ್ರಯೋಜನಗಳನ್ನು ಸಹ ಪಡೆಯಬಹುದು. ಠೇವಣಿ ಇಟ್ಟ ಹಣ, ಗಳಿಸಿದ ಬಡ್ಡಿ, ತೆಗೆದುಕೊಂಡ ಹಣಕ್ಕೆ ತೆರಿಗೆ ವಿಧಿಸಲಾಗುವುದಿಲ್ಲ.
ಪಿಪಿಎಫ್ ಯೋಜನೆಯಲ್ಲಿ ಪ್ರಸ್ತುತ ಶೇಕಡಾ 7.1 ರಷ್ಟು ಬಡ್ಡಿ ಸಿಗುತ್ತದೆ. ಪಿಪಿಎಫ್ ಯೋಜನೆಯಲ್ಲಿ ನೀವು ತಿಂಗಳಿಗೆ 3,000 ರೂಗಳನ್ನು ಹಾಕಿದರೆ, ನೀವು ಮುಕ್ತಾಯಕದ ಸಮಯಕ್ಕೆ ಸುಮಾರು 10 ಲಕ್ಷ ರೂ. ಪಡೆಯಬಹುದು. ನೀವು ಹೂಡಿಕೆ ಮಾಡುವ ಹಣ ರೂ 5.4 ಲಕ್ಷ ಆಗುತ್ತದೆ. ನಿಮಗೆ ಹೆಚ್ಚುವರಿ ಬಡ್ಡಿ ರೂಪದಲ್ಲಿ 4.4 ಲಕ್ಷ ರೂ. ಸಿಗುತ್ತದೆ.
ಪಿಪಿಎಫ್ ಯೋಜನೆಗೆ ಸೇರುವವರು ದೀರ್ಘಕಾಲದವರೆಗೆ ಹೂಡಿಕೆ ಮಾಡಬೇಕಾಗುತ್ತದೆ ಎಂಬುದನ್ನು ಗಮನಿಸಬೇಕು. ಇನ್ನೂ ಮೂರು ತಿಂಗಳಿಗೊಮ್ಮೆ ಬಡ್ಡಿದರ ಬದಲಾಗುವ ಸಾಧ್ಯತೆಯಿದ್ದು, ಪ್ರತಿ ಮೂರು ತಿಂಗಳಿಗೊಮ್ಮೆ ಈ ಯೋಜನೆಯ ಬಡ್ಡಿದರಗಳನ್ನು ಕೇಂದ್ರ ಸರ್ಕಾರ ಪರಿಶೀಲಿಸುತ್ತದೆ. ಅಂದರೆ ದರಗಳು ಏರಿಕೆಯಾಗಬಹುದು. ಇಲ್ಲದಿದ್ದರೆ ಅದು ಕಡಿಮೆಯಾಗಬಹುದು, ಇಲ್ಲದಿದ್ದರೆ ಸ್ಥಿರವಾಗಿ ಮುಂದುವರಿಯಬಹುದು.