ಮಂಗಳೂರು-ಬೆಂಗಳೂರು ರೈಲು ಸಂಚಾರ ಪುನರಾರಂಭ

ಸಕಲೇಶಪುರದ ಬಳಿ ಗುಡ್ಡ ಕುಸಿತದಿಂದ ಸ್ಥಗಿತಗೊಂಡಿದ್ದ ಮಂಗಳೂರು-ಬೆಂಗಳೂರು ಮಾರ್ಗ ಯಥಾಸ್ಥಿತಿಗೆ ಬಂದಿದ್ದು ರೈಲು ಸಂಚಾರ ಪುನರಾರಂಭಗೊಂಡಿದೆ.

ರೈಲು ಮಾರ್ಗದಲ್ಲಿ ಬಿದ್ದಿದ್ದ ಮಣ್ಣು ತೆರವು ಕಾರ್ಯಾಚರಣೆ ಸೋಮವಾರ ಸಂಜೆಗೆ ಪೂರ್ಣಗೊಂಡಿತ್ತು. ಈ ಹಿನ್ನಲೆಯಲ್ಲಿ ಬೆಂಗಳೂರು- ಮಂಗಳೂರು ಮಾರ್ಗದ ಎಲ್ಲ ರೈಲುಗಳು ಇನ್ನು ನಿಗದಿತ ವೇಳಾಪಟ್ಟಿಯಂತೆ ಸಂಚಾರ ನಡೆಸಲಿದೆ.

ಆದರೆ, ಮಣ್ಣು ಕುಸಿತ ಉಂಟಾಗಿದ್ದ ಸಕಲೇಶಪುರ- ಬಾಳುಪೇಟೆ ಮಾರ್ಗದಲ್ಲಿ ರೈಲು ಸಂಚಾರಕ್ಕೆ ವೇಗದ ಮಿತಿ ನಿಗದಿಪಡಿಸಲಾಗಿದೆ. ಆ.9ರ ಬಳಿಕ ಈ ಮಾರ್ಗದಲ್ಲಿ 2-3 ಬಾರಿ ಮಣ್ಣು ಕುಸಿತ ಉಂಟಾಗಿತ್ತು.