ಹೊಸಪೇಟೆ (ವಿಜಯನಗರ): ವಿಶ್ವವಿಖ್ಯಾತ ಹಂಪಿ ಸೇರಿದಂತೆ ವಿಜಯನಗರ ಜಿಲ್ಲೆ ಪ್ರವಾಸೋದ್ಯಮದಲ್ಲಿ ಭಾರಿ ವೇಗದಲ್ಲಿ ಬೆಳೆಯುತ್ತಿದ್ದು, ಇದರ ಲಾಭ ಸ್ಥಳೀಯ ಯುವಕರಿಗೆ ಸಿಗಬೇಕು ಹಾಗೂ ಅವರಿಗೆ ಲಕ್ಷಾಂತರ ರೂಪಾಯಿ ಸಂಬಳದ ಉದ್ಯೋಗ ಸಿಗಬೇಕು ಎಂಬ ಉದ್ದೇಶದಿಂದ ಹೊಸಪೇಟೆ ನಗರದಲ್ಲಿ ಶೀಘ್ರದಲ್ಲೇ ‘ಹೋಟೆಲ್ ಮ್ಯಾನೇಜ್ಮೆಂಟ್ ಕಾಲೇಜು’ ಮತ್ತು ‘ಕೌಶಲ ಅಭಿವೃದ್ಧಿ ಸಂಸ್ಥೆ’ ಸ್ಥಾಪನೆಯಾಗಲಿದೆ ಎಂದು ಶಾಸಕ ಎಚ್.ಆರ್. ಗವಿಯಪ್ಪ ಮಹತ್ವದ ಘೋಷಣೆ ಮಾಡಿದ್ದಾರೆ.
ಹೌದು, ಗುರುವಾರ ಡಾ.ಎ.ಪಿ.ಜೆ.ಅಬ್ದುಲ್ ಕಲಾಂ ವಸತಿ ಶಾಲೆಯ ಆವರಣದಲ್ಲಿ ₹6.33 ಕೋಟಿ ವೆಚ್ಚದ ಸಿಬ್ಬಂದಿ ವಸತಿಗೃಹ ಕಟ್ಟಡಕ್ಕೆ ಶಂಕುಸ್ಥಾಪನೆ ನೆರವೇರಿಸಿ ಅವರು ಈ ಭರವಸೆ ನೀಡಿದರು.
ಹೋಟೆಲ್ ಉದ್ಯಮದಲ್ಲಿ ಲಕ್ಷ ಲಕ್ಷ ಸಂಬಳ!
“ಇನ್ನು, ಮುಂದಿನ 10-15 ವರ್ಷಗಳಲ್ಲಿ ಹೊಸಪೇಟೆಯಲ್ಲಿ 15 ರಿಂದ 20 ಸಾವಿರ ಹೊಸ ಹೋಟೆಲ್ ಕೊಠಡಿಗಳು ನಿರ್ಮಾಣವಾಗಲಿವೆ. ಇಲ್ಲಿ ಅನುಭವಿ ಅಡುಗೆಯವರಿಗೆ (Chef) ತಿಂಗಳಿಗೆ ₹5 ರಿಂದ ₹6 ಲಕ್ಷದವರೆಗೆ ಹಾಗೂ ಕನಿಷ್ಠವೆಂದರೂ ₹90 ಸಾವಿರದವರೆಗೆ ಬಂಪರ್ ವೇತನವಿದೆ. ಪ್ರಸ್ತುತ ಹೊರರಾಜ್ಯದವರು ಬಂದು ಇಲ್ಲಿ ಕೆಲಸ ಪಡೆಯುತ್ತಿದ್ದಾರೆ. ನಮ್ಮ ಯುವಕರಿಗೇ ಈ ಉದ್ಯೋಗ ಸಿಗುವಂತಾಗಲು ಹೋಟೆಲ್ ಮ್ಯಾನೇಜ್ಮೆಂಟ್ ಕಾಲೇಜು ಆರಂಭಿಸಲಾಗುವುದು” ಎಂದು ಶಾಸಕರು ತಿಳಿಸಿದರು.
ಹೊಸಪೇಟೆ ಯುವಕರಿಗಾಗಿ ಏನೇನು ಬರಲಿದೆ?
ಕೌಶಲ ಅಭಿವೃದ್ಧಿ ಸಂಸ್ಥೆ: ಕೇವಲ ಹೋಟೆಲ್ ಉದ್ಯಮ ಮಾತ್ರವಲ್ಲದೆ, ಭವಿಷ್ಯದ ತಂತ್ರಜ್ಞಾನವಾದ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI Tech) ಬಳಕೆ ಹಾಗೂ ಮೊಬೈಲ್ ರಿಪೇರಿಯಂತಹ ಉದ್ಯೋಗ ಆಧಾರಿತ ಕೋರ್ಸ್ಗಳನ್ನು ಕಲಿಸಲು ಹೊಸ ಕೇಂದ್ರ ಸ್ಥಾಪನೆ.
ಸ್ಮಾರ್ಟ್ ಶಾಲೆ & ಹಾಸ್ಟೆಲ್: ಕಳೆದ 3 ವರ್ಷಗಳಲ್ಲಿ 9 ಹಾಸ್ಟೆಲ್ ನಿರ್ಮಾಣವಾಗಿದ್ದು, ಶೀಘ್ರದಲ್ಲೇ ₹15 ಕೋಟಿ ವೆಚ್ಚದಲ್ಲಿ ಹೈಟೆಕ್ ‘ಸ್ಮಾರ್ಟ್ ಶಾಲೆ’ ನಿರ್ಮಾಣವಾಗಲಿದೆ.
ಸರ್ಕಾರಿ ನೌಕರರಿಗೆ ವಸತಿ: ನೂತನ ವಿಜಯನಗರ ಜಿಲ್ಲೆಯಾದ ಮೇಲೆ ಬಳ್ಳಾರಿಯಿಂದ 67 ಇಲಾಖೆಗಳು ಹೊಸಪೇಟೆಗೆ ಬರಬೇಕಿದೆ. 7-8 ಸಾವಿರ ಸಿಬ್ಬಂದಿಗೆ ವಸತಿ ಕಲ್ಪಿಸಲು, ವರ್ಷಕ್ಕೆ 500 ರಂತೆ ಕ್ವಾರ್ಟರ್ಸ್ ನಿರ್ಮಿಸುವ ಮೆಗಾ ಪ್ಲಾನ್ ಸಿದ್ಧವಾಗಿದೆ.
ಒಟ್ಟಾರೆಯಾಗಿ, ಹೊಸಪೇಟೆಯನ್ನು ಕೇವಲ ಪ್ರವಾಸಿ ತಾಣವಾಗಿ ಮಾತ್ರವಲ್ಲ, ಉದ್ಯೋಗ ಸೃಷ್ಟಿಸುವ ಕೇಂದ್ರವನ್ನಾಗಿ ಬದಲಾಯಿಸುವ ನಿಟ್ಟಿನಲ್ಲಿ ಭಾರಿ ಸಿದ್ಧತೆಗಳು ನಡೆದಿವೆ.
