ಸಿಯೋಲ್: ಮಿಲಿಟರಿ ಸೇವೆಯಿಂದ ತಪ್ಪಿಸಿಕೊಳ್ಳಲು ಉದ್ದೇಶಪೂರ್ವಕವಾಗಿ ತೂಕವನ್ನು ಹೆಚ್ಚಿಸಿಕೊಂಡಿದ್ದಕ್ಕಾಗಿ ದಕ್ಷಿಣ ಕೊರಿಯಾದ ವ್ಯಕ್ತಿಗೆ ಶಿಕ್ಷೆ ವಿಧಿಸಲಾಗಿದೆ. ದೇಶದ ಸೇನಾ ಬಲವಂತದ ವ್ಯವಸ್ಥೆಯಲ್ಲಿ ಕಠಿಣ ಹುದ್ದೆಯನ್ನು ತಪ್ಪಿಸಲು ಉದ್ದೇಶಪೂರ್ವಕವಾಗಿ 20 ಕಿಲೋಗ್ರಾಂ(44 ಪೌಂಡ್) ಗಿಂತ ಹೆಚ್ಚು ತೂಕವನ್ನು ಪಡೆದಿದ್ದಕ್ಕಾಗಿ ದಕ್ಷಿಣ ಕೊರಿಯಾದ ವ್ಯಕ್ತಿಗೆ ಜೈಲು ಶಿಕ್ಷೆ ವಿಧಿಸಲಾಗಿದೆ ಎಂದು ಸಿಯೋಲ್ ನ್ಯಾಯಾಲಯ ಮಂಗಳವಾರ ತಿಳಿಸಿದೆ.
ದಕ್ಷಿಣ ಕೊರಿಯಾದಲ್ಲಿ, ಸಾಮರ್ಥ್ಯವುಳ್ಳ ಎಲ್ಲ ಪುರುಷರು 18-21 ತಿಂಗಳುಗಳ ಕಾಲ ಮಿಲಿಟರಿಯಲ್ಲಿ ಸೇವೆ ಸಲ್ಲಿಸಬೇಕು. ಆದರೆ ಆರೋಗ್ಯ ಸಮಸ್ಯೆಗಳಿರುವ ವ್ಯಕ್ತಿಗಳು ಮಿಲಿಟರಿಯೇತರ ಸೌಲಭ್ಯಗಳಾದ ಕಲ್ಯಾಣ ಕೇಂದ್ರಗಳು ಮತ್ತು ಸಮುದಾಯ ಸೇವಾ ಕೇಂದ್ರಗಳಲ್ಲಿ ತಮ್ಮ ಕರ್ತವ್ಯಗಳನ್ನು ನಿರ್ವಹಿಸಬಹುದು. ಅವರ ಸಮಸ್ಯೆಗಳು ಗಂಭೀರವಾಗಿದ್ದರೆ, ಅಂತಹವರಿಗೆ ಮಿಲಿಟರಿ ಕರ್ತವ್ಯಗಳಿಂದ ವಿನಾಯಿತಿ ನೀಡಲಾಗುತ್ತದೆ.
ಆದರೆ ಉದ್ದೇಶಪೂರ್ವಕವಾಗಿ ದೇಶದ ಸೇನಾ ಸೇವಾ ಕಾಯಿದೆಯನ್ನು ಉಲ್ಲಂಘಿಸಿದ್ದಕ್ಕಾಗಿ ಎರಡು ವರ್ಷಗಳ ಕಾಲ ಅಮಾನತುಗೊಳಿಸಿದ ವ್ಯಕ್ತಿಗೆ ಒಂದು ವರ್ಷ ಜೈಲು ಶಿಕ್ಷೆ ವಿಧಿಸಲಾಗಿದೆ ಎಂದು ಸಿಯೋಲ್ ಪೂರ್ವ ಜಿಲ್ಲಾ ನ್ಯಾಯಾಲಯ ಹೇಳಿದೆ. ಅಲ್ಲದೇ ಅಪರಾಧಕ್ಕೆ ಸಹಾಯ ಮಾಡಿದ್ದಕ್ಕಾಗಿ ವ್ಯಕ್ತಿಯ ಸ್ನೇಹಿತನಿಗೂ ಸಹ ಅಮಾನತುಗೊಂಡ 1 ವರ್ಷ ಜೈಲು ಶಿಕ್ಷೆಯನ್ನು ವಿಧಿಸಲಾಗಿದೆ ಎಂದು ನ್ಯಾಯಾಲಯ ಹೇಳಿದೆ. ಸ್ಥಳೀಯ ಮಾಧ್ಯಮಗಳು ಇಬ್ಬರೂ 26 ವರ್ಷ ವಯಸ್ಸಿನ ಸ್ನೇಹಿತರು ಎಂದು ವರದಿ ಮಾಡಿದೆ.
2017 ರಲ್ಲಿ ನಡೆದ ಪರೀಕ್ಷೆಯು 169 ಸೆಂಟಿಮೀಟರ್ (5 ಅಡಿ 6 ಇಂಚು) ಎತ್ತರ ಮತ್ತು 83 ಕಿಲೋಗ್ರಾಂ (183 ಪೌಂಡ್) ತೂಕದವರು ಸಕ್ರಿಯ-ಕರ್ತವ್ಯ ಸೈನಿಕನಾಗಲು ಸೂಕ್ತ ಎಂದು ನಿಗದಿಪಡಿಸಲಾಗಿದೆ. ಆದರೆ ತೂಕ ಜಾಸ್ತಿಯಾದರೆ ಸಮಾಜಸೇವಾ ಗ್ರೇಡ್ ಪಡೆಯಬಹುದೆಂಬ ಪರಿಚಿತರ ಸಲಹೆಯಿಂದ ವ್ಯಕ್ತಿ ದಿನನಿತ್ಯದ ಆಹಾರ ಸೇವನೆಯನ್ನು ದ್ವಿಗುಣಗೊಳಿಸಿ, ಹೆಚ್ಚಿನ ಕ್ಯಾಲೋರಿ ಇರುವ ಆಹಾರ ಪದಾರ್ಥಗಳನ್ನು ತಿನ್ನುವುದರತ್ತ ಗಮನ ಹರಿಸಿದ್ದು, ವಿತರಣಾ ಕೆಲಸಗಾರನಾಗಿದ್ದ ಅರೆಕಾಲಿಕ ಕೆಲಸವನ್ನೂ ತೊರೆದಿದ್ದಾಗಿ ತಿಳಿದುಬಂದಿದೆ.
ನ್ಯಾಯಾಲಯದ ಪ್ರಕಾರ, 2022-2023ರ ಮೂರು ದೈಹಿಕ ಪರೀಕ್ಷೆಗಳಲ್ಲಿ, ವ್ಯಕ್ತಿಯು 102-105 ಕಿಲೋಗ್ರಾಂಗಳಷ್ಟು (225-231 ಪೌಂಡ್‌ಗಳು) ತೂಕವನ್ನು ಹೊಂದಿದ್ದನು. ಅದು ಅವನನ್ನು ಸಮಾಜ ಸೇವೆಗೆ ಸರಿಹೊಂದುವಂತೆ ಮಾಡಿತ್ತು. ಆದರೆ ಆ ಪರೀಕ್ಷೆಗಳ ಮೊದಲು, ಆತ ಹೆಚ್ಚಿನ ಪ್ರಮಾಣದ ನೀರನ್ನು ಸೇವಿಸಿದ್ದ ಎನ್ನಲಾಗಿದೆ. ಆದರೆ ಶಿಕ್ಷೆಗೆ ಗುರಿಯಾದ ವ್ಯಕ್ತಿ ತನ್ನ ಮಿಲಿಟರಿ ಕರ್ತವ್ಯವನ್ನು ನಿಷ್ಠೆಯಿಂದ ಪೂರೈಸುವುದಾಗಿ ಭರವಸೆ ನೀಡಿದ್ದಾನೆ ಎಂದು ನ್ಯಾಯಾಲಯ ಹೇಳಿದೆ.
ಮಿಲಿಟರಿ ಮ್ಯಾನ್‌ಪವರ್ ಅಡ್ಮಿನಿಸ್ಟ್ರೇಷನ್ ಪ್ರಕಾರ, ಪ್ರತಿ ವರ್ಷ ಸುಮಾರು 50-60 ಮಿಲಿಟರಿ ಕರ್ತವ್ಯಗಳನ್ನು ತಪ್ಪಿಸುವ ಪ್ರಕರಣಗಳು ವರದಿಯಾಗಿವೆ. ಮಿಲಿಟರಿ ಕರ್ತವ್ಯಗಳಿಂದ ತಪ್ಪಿಸಿಕೊಳ್ಳುವ ಸಾಮಾನ್ಯ ಮಾರ್ಗಗಳಲ್ಲಿ ತೂಕವನ್ನು ಹೆಚ್ಚಿಸುವುದು ಅಥವಾ ಕಳೆದುಕೊಳ್ಳುವುದು ಅಥವಾ ಆರೋಗ್ಯ ಸಮಸ್ಯೆಗಳಿರುವ ಪುರುಷರು ದೈಹಿಕ ಪರೀಕ್ಷೆಗಳಿಗೆ ಮುಂಚಿತವಾಗಿ ಅಗತ್ಯ ವೈದ್ಯಕೀಯ ಚಿಕಿತ್ಸೆಯನ್ನು ತೆಗೆದುಕೊಳ್ಳುವುದಿಲ್ಲ ಎಂದು ಅದು ಹೇಳಿದೆ.
